AVISO IMPORTANTE: Agora o reCiclos ten blogue.
reCiclos é un ciclotaller autoxestionado; un taller de reciclaxe e reparación de bicicletas non comercial e xestionado de maneira independente e comunitaria. Un proxecto enmarcado no movemento Masa Crítica da Coruña co que, desde decembro do 2008, procuramos principalmente estender o uso da bici a través da democratización socio-económica do acceso á mesma e o seu mantemento.
Horario e localización.
Abrimos cada luns de 18:00 a 21:00h no soto do Fórum Propolis; no número 115 da r/Barcelona. Cada primeiro mércores de mes, en idéntico horario, celebramos unha xornada de limpeza e coidado xeral do local.
Como podo participar?
A participación é aberta e calquera persoa pode propoñer novas formas de cooperación. Agora mesmo estamos a traballar así:
_Se queres unha bicicleta pásate polo taller a ver o material do que dispoñemos; pode que atopes unha da túa talla practicamente lista para rodar, que teñas que ensamblar unha con pezas de varias bicis, recambios, etc ou que, desafortunadamente, teñas que agardar a que consigamos o material que precisas. Dispoñemos de toda a ferramenta necesaria e, na medida en que o precises, terás os nosos consellos e axuda.
_Igualmente, se só precisas facer algunha reparación na túa bici podes botar man da ferramenta do taller, dos repostos cos que contemos e da nosa colaboración.
_Se estás interesadx en implicarte máis no proxecto, melloralo, aprender e/ou compartir os teus coñecementos con outras persoas… adiante!
_O material do que dispoñemos provén da reciclaxe de bicis e pezas que atopamos no lixo e das xenerosas doazóns de moitas persoas e dos comercios locais de bicicletas. Pode que reCiclos sexa unha opción excelente para desfacerte dalgún trasto.
_Non terás por qué pagar nada por ningún servizo, peza nin bicicleta completa. Tan só existe un pequeno bote colectivo ao que cada quen aporta o que pode e quere, e o diñeiro non é a única forma de apoiar o taller.
Algunhas normas básicas.
reCiclos susténtase na solidariedade e responsabilidade de cada unha das persoas que fan uso do taller. As seguintes son unhas normas bastante importantes:
_Unha vez empregadas, as ferramentas deben deixarse recollidas. Se non sabes moi ben ónde deixalas, é algo que podes preguntar. Ídem cos repostos que desbotes ou gardes dunha semana para outra; practicamente todo está disposto cunha orde e iso axuda moito ao desfrute persoal e colectivo do taller.
_En reCiclos a escoba e o recolledor son ferramentas tan importantes coma calquera outra.
_reCiclos é un proxecto horizontal e inclusivo, as actitudes discriminatorias (machismo, racismo, menosprezo das persoas maiores, homofobia, etc.) van contra isto e reforzan valores dominantes, entre outros, no ámbito cultural da mobilidade, que este proxecto fai por transformar.
Un punto de encontro. Un lugar do posible.
Alén da reciclaxe e reparación, reCiclos é un lugar no que sempre emerxen e proliferan sociabilidades alternativas. As relacións e o tecido humano que o teñen convertido nunha referencia para todo tipo de prácticas comunitarias en torno á bicicleta e alén dela; activismos variados, saberes compartidos sobre cómo moverse en bicicleta pola Coruña, cultura DiY (faino ti mesmx), organización de rutas con alforxas, deportes/subculturas emerxentes como o bici-polo, horticultura ecolóxica, etc.
Ademais, o Fórum Propolis −onde nos aloxamos− ten unha traxectoria de dúas décadas funcionando, baixo diferentes formas, como espazo para a autoorganización social (en especial das persoas migrantes) no barrio da Agra do Orzán.
Contacto:
http://reciclos.wordpress.com/
porpropolis[arroba]gmail[punto]com
3 comentarios
Comments feed for this article
Maio 28, 2012 ás 9:41 pm
recicloelciclo
anda! que ben montado o tedes en Coruña!, non sabía nada.Espero que vos vaia ben!
Xuño 7, 2012 ás 1:23 am
Um espaço comunitário de manutenção de bicicletas na Corunha
[…] Um espaço comunitário de manutenção de bicicletas na Corunha velosofia.wordpress.com/rciclos/ por beto hai 4 segundos […]
Maio 28, 2013 ás 8:06 pm
miguel anxo
Anda e eu que ía ver se atopaba un taller onde darlle vida a miña vella MBK de carreiras….?para facela máis urbana xa que teño unha TREK para imitar a Indurain,Pois non sei se pasarme a ver se me dades algunha idea para reciclala